+0 به یه ن
تبریزین شهرداری موزه سینده قورولان بایرام یومورتالارینین سرگی سی ، بو گونلر بو شهرده لاپ چوخ گؤرولن سرگی لردن بیری ساییلیر . شهرداری ساختمانیندا اولان بو سرگی ، تبریز شهرینین اؤنملی هنرمندلرینین ایشلریندن توپلانیب و گؤرنلر بو یومورتالارا اؤنر وئریرلر . تبریزه گلسز حتما بو سرگیه باش وورون . چوخ گؤزل ایشلر وار . بو سرگی نین گؤزل ایشلریندن بیری بو شكیل دی .
+0 به یه ن
تبریز بیلیم یوردونون اؤیرنجی لری بایرام مناسیبتی ایله بیر كیتاب سرگیسی آچاجاقلار. بو سرگی شنبه گونو ایسفندین 14 دن 18 اینه دك بیر هفته موددتینده تبریز بیلی یوردونون مركزی ساختمانس نین اؤنونده داییمی سرگیلر یئرینده ( شهید آوینی نیگارخاناسیندا ) داییر اولاجاق .
بو سرگی آذربایجان تانیتیم اوجاغی و دیگر تورك اؤیرنجی لرین هیممتی ایله قورولوب .
+0 به یه ن
اولو تانری نین آدی ایله
بو یازی منیم بو بلاق دا اولاراق 100-اونجو یازیم ساییلیر . بو 100 یازیدا چالیشمیشام توركی دیلده یازماقینان ، دیلداشلاریمین اؤز دیل لرینده وئبده گزماقلارینا یاردیم اولام . بو بلاقین ایلك یازیسی بو ایلین مرداد آییندا یازیلیب و یوزونجو یازینی دونیا آنا دیلی گونونده یازماقیما گووه نیرم . بو نئچه آی دا چوخلو یولداشلار تاپمیشام ، چوخلو یولداشلار منی بو یولدا آلقیشاییبلار ، یولداشلاریمین چوخون آرتیق تانیمیشام و یولداشلاریمنان چوخلی اؤرگنمیشم . بورادا بو عزیزلردن تشكر ائتمه لییم . منیم یانلیش لاریمی منه بویورانلاردان ، باخیش لاری ایله منی بو یولدا آرتیق گئتماقا ماراغلاندیرانلاردان و باشقا دیلداشلاریمنان دا میننت دارام . بو بلاقی یازماقدا عزیز یولداشیم « سعید حبیب پور» دان دا تشكر ائله مه لیم . بلاق دا لاپ چوخ باخیشلاری ایله منی فایدالاندیران « بیتا » خانیم دا منه بو یولدا چوخلی یاردیم اولوبلار . تانریدان دیله ییرم ائلیه بولم یوردوما و دیلیمه آرتیق تانیش اولام . سیزین ده باخیش لاریزی گؤزله ییرم .
یاشاسین منیم دیلیم
احمد
+0 به یه ن
بوگون چارشمبه بهمنین 27نجی گونو مظلوم اهالی نین ایهمالا قوربان گئتدیك لری او قورخونج اؤلوملو اوچاق قضاسینین قیرخینجی گونودور. او طالعسیز گونده هموطنلریمیز مظلومجاسینا جان وئردیلر. یول و ترانسفر باخانی میللت وكیل لری طرفیندن سورقویا آلیندی ، آمما باخان حتی مجلیس ده اولما نزاكتینده بولونمادی. رییس جمهوردا بئله بیر نزاكت گوسترمه دی . سانكی بیزیم هموطن لریمیز اؤلومه محكوم ایمیشلر. مجلیس سورومسوز باخانی ایشدن آلدی ، آمما رییس جمهور اینسانلارا عیناد دیه اونو آلیب دانیشمان لاری اوردوسونا داخیل ائدیب و یئنیدن كابینه یه سوخدو. مملكتین اوست اوزی دین آدامی و بیرینجی مقام دا اولانلارا حتی بیر تعزیه مئساژیدا وئرمه دی. بو اینسانلیق مودور ؟ بو وطن سورلیك مودور ؟ بو مملكت دارلیق مودور ؟
اورمولو تایماز ( بیر آز دییشمه ایله )
آردین دا اوخویون !
+0 به یه ن
تبریز سسی : " یالقیز " تخلص لی اوستاد مجید صباغ ، آزربایجانین تانینمیش طنز شاعیری اوزون مدت "بؤیرك " خسته لیگی چكدیكدن سونرا ، دوز گونو (دوشنبه ) 4 / بهمن / 1389 تبریزده حیاتا وداع ائتدی .
آزربایجان میلّتینی طنز شعرلری ایله گولومسوندوره رك اونلارین آجی – آغریلارینی طنز ایچینده بیان ائدن شاعیرین جنازه سی ، تك گونو (سه شنبه ) 5 /11/ 89 آزربایجان و تبریزین شاعیرلر ، یازیچیلار و ادب سئورلری نین اشتراكی ایله تشییع اولدوقدان سونرا تبریزین وادی رحمت مزارلیغیندا تورپاغا تاپشیریلدی !
اوستاد "یالقیز " 1316 هجری گونش ایلی و 1937 میلادی ایلینده تبریزین " چای كنار " محله سینده دونیایا گوز آچدی و 73 ایل دگرلی عؤمورو زامانیندا اؤزوندن اوچ كیتاب " جیغان-ویغان " ، "چیغیر-باغیر " ،" چال ها چال" ادیندا طنز اثری یادگار قویدو .
اوستاد یالقیز 1383 – جو ایلدن تبریزین "عصر آزادی " نشریه سی نین "سؤز آلان سؤز ساتیرام "
طنز بؤلومو نده ده شعرلرینی ارائه ائدیردی ، اونون شعرلریندن بیر اؤرنك :
اؤلوباز بیر دلی خلقیك بیزه بو ارث‌دی باشدان
كئچه‌ریك بیر اؤلودن خاطیره مینلر دیری باشدان
اؤلو حقینده قوشوب، یازدیغیمیز نوحه، مراثی
دیری‌لر سهل‌دی قان یاش چیخارار قاپ قارا داشدان
اؤلونون آردیجا احسان وئره‌ریك یاغ- دوگو تای- تای
دیری اؤلمكده آجیندان پایی یوخ بیر كاسا آش‌دان ... !
اوستاد یالقیز ، جسمی باخیمدان آرتیق بیزیم ایچیمیزده اولماسادا اونون اؤز میلّتینه سئوگیسی و دوغما دیلیمیزده یازدیغی طنز اثرلری اونو ابدی اولاراق آزربایجان میلّتی خاطیرینده ساخلایاجاقدیر !
روحو شاد اولسون .
+0 به یه ن
+0 به یه ن
اؤیرنجی گونی بوتون اؤیرنجی لره قوتلو اولسون .
اؤیرنجی گونو بونا گؤره دی كی اوندا اؤیرنجی لری عزیز سایاق . آمما بو ایش نئجه اولا بیلر ؟ یادیمدا بیلدیر بو واخت لار بیزیم تبریزین آزاد بیلیم یوردوندا بیر تشكیلات واریدی « آرمان دانشجو » آدیندا . بورادا آذربایجانی سئون اؤیرنجی لر بوتون بیلیم یوردلاردان ( حتی دولتی و پیام نور ) ییغیشمیشدیلار بیر یئره . كاش او گونلر اولایدی ! بیز توركی دیلده یازیب اوخوماغا اوردا ییغیشاردیق . من ایلك دؤنه اوردا توركی یازماق اؤرگشدیم . او دا « آیدین سرداری نیا » جنابلاریندان . نه بویوك نئعمت واریدی الیمیزده ! قدرین بولمه دیق . تانری بو سروتی الیمیزدن آلدی . كاش او گونلر اولایدی ، بیز بیرده بیرلیك ده « ده ده قورقود » كیتابین اوخویایدیق . كاش او گونلر اولایدی ، « انصار بی » بولتن لره تیراختورچولارین عكس لرینی وورایدی . كاش او گونلر اولایدی بولتن لری اوخویوب گؤزل آذربایجانین گؤرمه لی یئرلرینی آرتیق تانییایدیق . كاش ...
گلین اؤیرنجی لری عزیز سایاق و اونلارین ایسته دیق لارین دا دیرلی بولاق .
تانری دان او گونی ایستیرم بیرده او تشكیلاتین قاپیسی آچیلسین ، بیرده اوردا بیرله شاق .
+0 به یه ن
هر كیمدن آییرسان منی، تبریزدن آییرما
بو سئوگیلی یوردون نفسین بیزدن آییرما
اینسانه وطن، روكنی- تواندیر، دایاناق دا
آللاهینا باخ، طاقتیمی دیزدن آییرما
تبریزله عزیز اولدوم، ایزیم قالدی جاهاندا
توفانه دؤنوب گل منی بو ایزدن آییرما
چوخلار سؤزودور، شهری- بلادیر بو بلاخیز
من زادی- بلانی بو بلاخیزدن آییرما
آخسام آرازام، آخماسام آنجاق قورو باتلاق
دریا چاغیریر، گل ائوی ائوسیزدن آییرما
محمود قبّه زرین (آراز)
تبریزده قارداشلارین سنی بیر عؤمر ماحمود داداش دئیه- دئیه چاغیردیلار؛ تهراندا غلامحسین ساعدی یه سنی ماحمود داداش چاغیرماغا هئچ ایذن وئردیلرمی؟
تهرانین وحدت تالارینا سؤیله یین بوراخسین آرازیمیزی؛ بو آراز آراز ایله بیرگه چاغلاماق ایسته ییر. وحدت تالارینین قارشیسیندان یولا سالین گلسین تبریزین گول اوغلون، مئهریبان اوغلون! آخی آشیغی بیر عؤمر تبریزده "چال آشیق" دئیه- دئیه چالدیرماغا چاغیرماق ایسته ییب بو تورپاغین اییید اوغلو! تهراندا یوخو آلمیش گؤزونو...
آی بالام! بالا باغداكی شیر و خورشید تالارینین آدرئسینی بیلن وارمی؟! تهران، وحدت تالارینین قارشیسیندان یولا سالسا دا؛ تبریز، بو خلف ائولادینی بو تالارین قارشیسیندان یولا سالماق ایسته ییردی آخی...