"درمان بیتگی لری" فولكلور وارلیغیمیزدان بیری ساییلیر. اسكی زامانلاردان اؤرگشدیغیمیز آرالیق درمانلاری هله ده ایشله نه بیلیر. بیزیم آتالاریمیز بونلاری ایشلدیب و ساغ یاشاردیلار.

آرالیق درمانلاریندان نئچه سی:

قیزیلجا: قیزیلجا چیخاردانا شیرین (ایستی لیك) یئدیردردیلر، جانی سپسین، مرضی ائشیگه تؤكسون. قیرمیزی گئییندیرردیلر. قیزیلجا چیخاردان اوشاغا گرك بویونوندا قولو (غسل) اولان آدام باخمایاردی.

چؤر-چؤپ: بیر اوشاغین امزیگینده لپه، توخوم، چؤپ كیمی شئی لر قالاردی. بیبارین توزونو اونون قاباغیندا قاریشدیراردیلار. توزو بورنونا گئدر، بئش-آلتی دؤنه دال با دال آسقیرار، هر نه چؤر-چؤپ وار، امزیگیندن گلر تؤكولردی. بیلن آدام اونو تئلك ایله چیخارداردی.

گؤزه چؤپ دوشمه: بیرینین گؤزونه چؤپ یا قوم كیمی شئی لر دوشنده، بیر آدام، دیلی نین اوجو ایله چیخارداردی.

بوغاز گلمه: بوغازی گلن آدامی بیر بیلن آدامین یانیندا آپاراردیلار بوغازین باساردی. بارماغین سوخار یا آغاج قاشیغی نین ساپی ایله باساردی، بوغازیندا چیركلی وزی سی (غدّه) اولاردیرسا، دئشیلر و قانلی چیرك گلردی.

سویوق دیمه: سویوق دین آدامین بوغازینا تیریئك سورتوب سیغال لایاردیلار.

قیمیج باتما: بیری نین قیمی جی باتمیشدیری. ساققیز سالدیرار، كوپه سالدیرار، ساغالمادی، چیلله داغی ایله قویروغو دؤیوب قاتدیلار و قویدولار.

باش آغریسی: باشی آغریان آدام زنجفیلی دؤیر، سئهین (ساخسی قاب) گؤتونده آزجا سو ایله قاتیب-قاریشدیرار و آلنینا چكردی.

كئچل: گؤی داشی دؤیر، الك دن كئچیردر، كئچل باشا سپردیلر.

یارا: اسكی (كؤهنه) یون پارچانی یاندیرار، كولونه یاغ یا كره قاتار، یارایا قویاردیلار. رو مرحمه یاغلی – قره دئیردیلر.