+0 به یه ن
ویلیام سامرست موآم اینگیلیسلی حیكایه، تیاتر و رومان یازاری پاریسده دوغولدو. آتاسی اینگیلیسین پاریسده كی خارجی ایشلر اداره سینین ایشچیسی ایدی. حكیملیك تحصیلاتینا باخمایاراق هئچ زامان طبابت ائله مه ییب، عومرونو یازیچیلیغا صرف ائتدی. ان یاخشی یازی لاریندان « آی و آلتی پئنس »ی آد آپارماق اولار. بو اثر فرانسه لی رسام « پول قاق »ین یاشامی اساسیندا یازیلمیش و " shendeng " اونون ساواش خاطیره لری دیر.
« موآم »ین تیاترلاریندا « دایزه » ، « لئزارین آروادی » و « مكتوب » ان یاخشی و سئچیلمیش اثرلردیلر. بونونلا بئله كی یازی لاریندان چوخ آز دویغو دویولور، آنجاق اونلارین سطرلریندن « موآم »ی تانیماق اولار.
یورد
اكین یئرلری « سامرست شایر » تپه لرینین اورتاسیندا كی دره ده یئرلشمیشدی. داشدان قاییریلمیش كؤهنه بیر ائو، كیچیك – كیچیك اوتاقلار، تؤوله و كاهالار اونو قوجاقلامیشدی. قاپی نین اوزرینده قازیلان داش یازی ائوین یاشینی 1673 – جی ایله قایتاریردی. ائوین بوز رنگه چالان گون یاندیرمیش قاپ – باجاسی، هندورینده كی آغاجلار، گؤز اوخشایان بیر گؤرونتو یارادیردی. یولدان باغا گلن خیاباندا، چینار آغاجلاری كورَك – كورَیه دایانمیشدیلار. اورادا یاشایان اینسان لار، باش آشاغی، گوجلو و ائوین اؤزو كیمی اسكی گؤرونوردولر. اونلار تكجه بونا گوونیردیلر كی ائو تیكیلندن بری، آتادان اوغولا اوردا دوغلوب و قیریلمایان بیر زنجیر كیمی اوردا یاشامیشدیلار. او زمیلری اكیب – بیچدیكلری اوچ – یوز ایل اولاردی. « جورج میدووز » اللی یاشلی بیر كیشی ایدی، حیات یولداشی ایسه بیر – ایكی یاش اوندان جاوان گؤرونوردو. اونلار ایكیسی ده یاخشی و دَیرلی اینسانلار ایدیلار.، ایكی اوغلان و اوچ قیزلاری واریدی. اوشاقلار دا گؤزل و دایاناقلی گؤرونوردیلر. من او زامانا قدر او ائو كیمی، ال – بیر ائو گؤرمه میشدیم. ایش سئور، گولر اوز و مهربان اینسانلاریدیلار. او ائوین یاشاییشیندا هر شئی واریدی، اونون گؤزللییین تكجه « بتهوون »ین سینفونی لرینده و « تایتان »ین رسم لرینده گؤرمك اولاردی. خوش یاشاییردیلار و شنلییه یارایان آداملاریدیلار. ائوین بؤیوگو « جورج میدووز » دئییلدی، كندلی لر دئییدیلر كی او ایكی اوغلو جاندادیر. آنا یئتمیش یاشیندایدی، اوجا بوی، ائنلی كورك، دوشونجه لی، آغ بیرچك بیر قادین ایدی، بونونلا بئله اوزو چوخ قیریشمیشدی، آنجاق گؤزلرینده مهربانلیق پارلایاردی. اونون سؤزلری ائده ده، زمیده ده آنا یاسایدی، نه اولسون كی چوخ سئویملی یاسا. آنانین سؤزو « بیر » اولسایدی دا آنجاق چوخ محببتلییدی. اونون گولمه جه لری هامینی گولدوروب و آغیزدان – آغیزا گزردی. آنا یاخشی بیر تاجیر ایدی. اونون اورَیینده محكم ایراده ایله بیر جور گولدوروجو دویغو بیر یئره ییغیلمیشدی. او اؤزل بیریسی ایدی.
بیر گون ائوه ساری دؤننده « جورج »ون جانیمی منی سسلدی. او دوغرودان دا حؤوصله لییدی. اونون قایین آناسی كندده تكجه « میدووز » تانیناردی. « جروج »ون خانیمینا « جورج » خانیم دئییلیردی.
- " فیكر ائله ییرسن كیم ایستیر بورا گلسین؟" مندن سوروشدو. " جورجون عمیسی، بیلیرسن او چینده یدی ".
- " بس بئله، من ائله بیلیردیم او اؤلوب ".
- " بیزده ائله دوشونوردوك ".
من « جورج » عمینین ناغیلینی ایگیرمی – اوتوز دؤنه ائشیتمیشدیم. ناغیل هر دفعه اسكی بیر افسانه كیمی منی اؤزونه آلاردی. ایندی او ناغیل گئرچك اولموشدو. اللی ایل اؤنجه، او زامان كی " میدووز " خانیم هله " ائمیلی قرین " آدلانیردی، " جورج " ون قارداشی " تام " ایكیسی ده اونا ائلچی دورموشدولار. آنجاق " ائمیلی " " تام " لا ائولنندن سونرا " جورج " دنیزه گئتمیشدی.
اونلار عمی جاندان تكجه بیر دؤنه " چین " ساحیل لرینده خبر توتموشدولار. بیر دفعه ده ایگیرمی ایل سونرا اونلارا هدیه یوللامیشدی، و داها باشقا بیر خبر اولمامیشدی. " تام " اولندن سونرا " میدووز " خانیم " جورج " عمی جانا مكتوب گؤندریب و " تام " ین اؤلوم خبرینی وئرمیشدی. آنجاق هئچ جاواب آلانمامیشدی. سونوندا عمی نین اؤلومونو یقین ائتمیشدیلر. آمما ایكی – اوچ گون اونجه اونلارا بیر مكتوب گلدی. مكتوبو دونیزچی نین ائو ایشچیسی " پورتزماوث " دان گؤندرمیشدی. بئله معلوم اولوردو كی عمی جان اون ایلدیر " روماتیسم " خسته لییینه دوچار اولوب و فلجدیر. اینیدی ایسه عؤمرونون سون گونلرینده دوغولدوغو یئر و ائوی گؤرمه یی دوشونوردو. " آلبرت میدووز " اونون ان بویوك قارداش نوه سی " پورتز ماوث " ا گئتمیشدی، یئتیشركن اونو ائوه گتیرسین، عمی جان آخشام یئتیشه جك دی.
جورج خانیم دئدی: " ناغیل كیمی دیر، او اللی ایلدن آرتیقدیر بورا گلمه ییب، منیم جورجومودا گؤرمه ییب، او آز قالیر اللی بیر یاشینا آیاق قویسون. "
من سوروشدوم: " میدووز خانیم نه دوشونور؟ "
- بیلیرسن او نه جوردی دا. او بوردا اوتوراركن اؤز – اؤزونه گولور. تكجه دئییر: او بوردان گئدنده گؤزل و سئویملی ایدی، آمما قارداشی كیمی قاییم دئییلدی. " اونا گؤره ده او زامان منیم جورجومون آتاسین سئچدی. آنجاق یئنه دئییر: " بلكه ایندی بیرآز دوشونوب. " لندندن سونرا باشقا بیر یئری گؤرمه ین كندلی خانیم لارین اؤزل ساده لییی ایله " جورج " خانیم مندن ایسته دی ایچری كئچیب، اونو گؤرم. بدله دوشونوردوكی، منیم بیر زامان چینده قالدیغیما گؤره، منله عمی جانین دوشونجه لری یاخین اولموش اولا. البته من آنلاییب و قبول ائتدیم. من یئتیشنده عایله هامیسی ائوده ایدی، اونلار بؤیوك كؤهنه آشپزخانایا ییغیشمیشدیلار، " میدووز " خانیم همیشه كیمی اوجاغین قیراغیندا صندلینده چوخ شستلی – بستلی اَییلمیشدی، اونو گؤرونجه سئویندیم، او ان یاراشیقلی ایپك دونونو گئییب، اوغلو، گلینی و اوشاقلاریله بیرلیكده ماسانین آرخاسیندا ایلشمیشدی. اوجاغین او تاییندا، بئلی بوكوك قوجا بیر كیشی ایلشمیشدی. چوخ آریق ایدی و اینسانا ائله گلیردی كی، اونون دریسینی گئنیش بیر پالتار كیمی سوموكلرینین اوستونه گئیدیریبلر. اوزو قیریشمیشدی و سارالمیش گؤرونوردو، دیشلرینین هامیسی تؤكولموشدو.
اونونلا ال وئریب گؤروشدوم.
دئدیم: " چوخ سئوینیرم، سیز بورا ساغ – سالامات یئتیشمیسیز. "
" كاپیتان " او دوزلتدی.